Azərbaycan, Bakı, 23 sentyabr /Trend, müxbir A.Yusifzadə/
Türkiyənin "TRAO" Neft Şirkətinin və "Botas" Boru Kəməri Şirkətinin 49 faiz səhmlərinin satışı ilə bağlı niyyətləri bu şirkətləri Azərbaycanla bağlayan enerji layihələrinə təsir etməyəcək. Bu barədə Türkiyənin Energetika və Mineral Ehtiyatlar Nazirliyinin mətbuat katibi Mehmet Akif Şam çərşənbə günü telefonla Trend-ə bildirib.
"Neft və qaz sahəsində Azərbaycanla Türkiyə arasında əməkdaşlıq üçün heç bir mənfi nəticə olmayacaq", - Şam bildirib.
Onun sözlərinə görə, Azərbaycan şirkətləri Türkiyə şirkətləri ilə birgə bu iki dövlət şirkətinin səhmlərinin əldə edilməsində iştirak edə biləcəklər.
Hazırda "TRAO" və "Botas" şirkətlərinin 49 faiz iştirak payının satışı baxılma mərhələsindədir. Bu istiqamətdə daha intensiv işlər 2011-ci ildən başlanacaq. Şam bildirib ki, iştirak payının satışı özəl sektorun fəaliyyətinin genişləndirilməsi məqsədi daşıyır.
Hazırda Türkiyənin "TRAO" Neft Şirkəti Azərbaycanın bir neçə iri enerji layihələrində iştirak edir. Şirkət, həmçinin, Xəzərin Azərbaycan sektorundakı "Azəri-Çıraq-Günəşli" neft yataqları blokunun işlənməsi layihəsinin iştirakçısıdır. "TRAO", həmçinin, Azərbaycanın yüngül neftinin əksər hissəsinin dünya bazarlarına çıxarıldığı "Bakı-Tbilisi-Ceyhan" neft kəməri konsorsiumunun da iştirakçısıdır.
"Azəri-Çıraq-Günəşli" layihəsinin iştirakçıları aşağıdakılardır: bp (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoyl" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
AÇG-dən neft BTC neft kəməri ilə nəql olunur.
BTC Co-nun səhmdarları aşağıdakılardır: bp (30,1 faiz); "AzBTC" (25 faiz); "Chevron" (8,90 faiz); "Statoil" (8,71 faiz); "ТРАО" (6,53 faiz); "Eni" (5 faiz ); "Total" (5 faiz); "Itochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
"TRAO" neft layihələri ilə yanaşı, Azərbaycanın "Şahdəniz" qaz-kondensat yatağının işlənməsinin də iştirakçısıdır.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, "TPAO" - 9%, ARDNŞ - 10%. Bu yataqda hasil olunan qaz Cənubi Qafqaz qaz boru kəməri ilə (Bakı-Tbilisi-Ərzurum) nəql olunur.
"Botas" Bakı-Tbilisi-Ceyhan neft kəməri və Cənubi Qafqaz qaz-boru kəmərinin Türkiyə sahəsində işləyir.