Azərbaycan, Bakı, 22 sentyabr /Trend, müxbir E.İsmayılov/
İlin sonuna qədər ARDNŞ-nin (Azərbaycan Dövlət Neft Şirkəti) brendi altında yanacaqdoldurma məntəqələrinin sayı 62-63-ə çatacaq. Bu barədə Gürcüstanda ARDNŞ-nin törəmə şirkəti olan "SOCAR Energy Georgia" mənbəsindən verilən məlumatda deyilir.
Onun sözlərinə görə, bu günlərdə daha iki məntəqənin istismara verilməsi planlaşdırılır. Hazırda ARDNŞ-nin Gürcüstanda yanacaqdoldurma məntəqələrinin ümumi sayı 46 ədəd təşkil edir.
"SOCAR Energy Georgia"nın həmtəsisçiləri - ARDNŞ -51 faiz, "Petro-Trans FZCO" - 24,5 faiz və İvan Çxartişvili - 24,5 faiz.
Bu ildən etibarən, ARDNŞ, həmçinin, Azərbaycanda da neft məhsullarının pərakəndə satışı sahəsində fəaliyyətini genişləndirib. Belə ki, bu günlərdə Bakıda daha iki yanacaqdoldurma məntəqəsi açılıb. Hazırda Azərbaycanda ARDNŞ brendi altında cəmi 5 yanacaqdoldurma məntəqəsi fəaliyyət göstərir. Şirkətin Azərbaycanda stansiyalarının sayını 26-ya çatdırmaq planlaşdırılır.
Bundan əvvəl ARDNŞ-nin prezidenti Rövnəq Abdullayevin dediyi kimi, yanacaqdoldurma məntəqələrinin açılması şirkətin strateji inkişafının bir hissəsidir. Strategiya karbohidrogenlərin hasilatı, məhsulların istehsalı və pərakəndə satış bazarında gerçəkləşməsi də daxil olan işləri nəzərdə tutur.
