Azərbaycan, Bakı, 19 oktyabr /Trend, müxbir N.İsmayılov/
Qazdan istifadə üzrə Sənaye və Energetika Nazirliyi tərəfindən hazırlanan yeni qaydalar baxılmaq üçün Azərbaycan Prezidenti Administrasiyasına göndərilib. Bu barədə çərşənbə axşamı ölkənin Sənaye və Energetika Nazirliyi yanında Dövlət Qaz Nəzarəti İdarəsinin rəhbəri Asif Zeynalov deyib.
Onun sözlərinə görə, bundan əvvəl yeni qaydalar Azərbaycan Nazirlər Kabinetinə təqdim edilmişdi. O, onlara baxdıqdan sonra Sənaye və Energetika Nazirliyinə qaytarıb. Sənəd tövsiyələr nəzərə alındıqdan və dəyişikliklər edildikdən sonra, yenidən Nazirlər Kabinetinə təqdim edilmişdi.
Sənəd Nazirlər Kabineti tərəfindən təsdiq edildikdən sonra, Azərbaycan Prezidenti Administrasiyasına göndərilib.
Zeynalov qazdan istifadə üzrə qaydaların olmasının əhəmiyyətini qeyd edib.
İndiyədək respublikada qazdan istifadə üzrə unifikasiya olunmuş milli qaydalar olmayıb və bu sahədə münasibətlər hələ sovet dövründə hazırlanmış qaydalar əsasında tənzimlənib. Hazırlanmış sənəd istehlakçıların hüquqlarının müdafiəsinə yönəlib və onların qazdan istifadə sahəsində hüquqları və öhdəlikləri barədə məlumatlandırılması məqsədi daşıyır.
Qaydaların bəndlərindən biri yaşayış binalarının birinci mərtəbələrində qazdan istifadə hüququdur. Əgər hazırda yaşayış məqsədi üçün istifadə olunmayan binanın birinci mərtəbəsində qazdan istifadə qadağan olunubsa, yeni qaydalarda belə obyektlərdə qazdan istifadə nəzərdə tutulub. İcazə bir dördgözlü pilitənin və bir standartlara uyğun suqızdırıcının olmasını nəzərdə tutur.