Azərbaycan, Bakı, 8 dekabr /Trend, müxbir Ü.İsmayılova/
2010-cu ildə Azərbaycanda 2153 bina istilik sistemi ilə təchiz olunub. 2005-ci ildə bu rəqəm 988 bina olub. Bu barədə "Azəristiliktəhcizat" ASC rəhbərinin müavini İlham Mirzəyev "Əmlak Bazarı İştirakçıları" İctimai Birliyinin jurnalına müsahibəsində bildirib.
"Yeni və modernləşdirilmiş qazanxanalarda müasir və bütün ekoloji tələblərə cavab verən, eləcə də elektrik enerjisinə qənaət olunmasını təmin edən Avropa şirkətlərinin istehsalı olan istilik sistemləri quraşdırılıb", - Mirzəyev bildirib.
Onun sözlərinə görə, texniki əsaslanmanın işlənməsindən, eləcə də Standartlaşdırma, Metrologiya və Patent üzrə Dövlət Komitəsinin müvafiq sertifikatının alınmasından sonra cari ildən kiçik binalar üçün "Kombi" istilik sistemlərinin istismarı tətbiq olunub.
Mirzəyevin sözlərinə görə, istiliyin əldə olunması üçün əsas resurslar elektrik, qaz və sudur. Yeni avadanlıqlar bu resurslardan daha səmərəli istifadə üçün imkan yaradır.
"Hazırda istifadə olunan qurğularda səmərəli iş əmsalı 92 faiz təşkil edir. Köhnə qurğularda bu göstərici 50-60 faizdir. Eləcə də hazırda 1 Qkal istiliyin istehsalı üçün istifadə olunan qazın həcmi köhnə qurğularda istifadə olunan 190 kubmetrə qarşı 130-135 kubmetr təşkil edir", - o bildirib.
İstilik itkisi ilə bağlı Mirzəyev bildirib ki, 2009-cu ildə itkilərin həcmi 2006-cı ildəki 29 faizə qarşı 20 faiz təşkil edib. 2009-cu ildə su sərfi 2006-cı ildəki 2,6 milyon kubmetrə qarşı bir milyon kubmetr təşkil edib.
2005-2009-cu illərdə Bakıda və ölkənin regionlarında 23 yeni qazanxana tikilib, 52 modul tipli qazanxana quraşdırılıb, 54 köhnə qazanxana modernləşdirilib, 28 istilik məntəqəsi yenidən qurularaq müasir qazanxanalara çevrilib, qazlaşdırma üzrə 115 layihə həyata keçirilib, səkkiz istilik məntəqəsi tam təmir olunub, eləcə də 507 yaşayış binasının əsas istilik xətti təmir olunub.