Azərbaycan, Bakı, 13 dekabr /Trend, müxbir E.İsmayılov/
"SOCAR Trading"in Sinqapur ofisi üçüncü ölkələrin neft və neft məhsullarının ticarətinə yönəlib. Bu barədə ARDNŞ-nin yüksək vəzifəli nümayəndəsi deyib.
Onun sözlərinə görə, Cənub-Şərqi Asiyanın bazarı Avropa bazarından öz spesifikliyi ilə fərqlənir. Bu bazarda ilk növbədə maye neft yüklərinin saxlanılması üçün qurğular olmalıdır. Burada məhsulu kiçik hissələrlə (1-2 min ton) alan kiçik ticarət də üstünlük təşkil edir.
Bu halda söhbət adıçəkilən neft bazarında "Azeri Light" növlü neftin məcburi satılmasından getmir.
"Bu, sırf treyder fəaliyyətidir", - mənbə qeyd edib.
ARDNŞ-nin treydinq şirkətinin fəaliyyətinin istiqamətlərindən biri "Azeri Light" markalı neftlə ticarətdir, lakin Cənub-Şərqi Asiya bazarının, xüsusilə də Sinqapur bazarının dünyada ən çox intensiv olmasını nəzərə alaraq, burada üçüncü ölkələrin nefti ilə ticarətə üstünlük verilir", - mənbə bildirib.
Bundan əvvəl "SOCAR Trading" şirkətinin vitse-prezidenti Arzu Əzimovun dediyi kimi, gələn il Asiyada mazut və nafta ilə ticarətin genişləndirilməsi nəzərdə tutulur. Bu, Sinqapurdakı rezervuarların lizinqini nəzərdə tutur.
"SOCAR Trading" Sinqapurdakı ofisini Asiyada xam neft ticarətinin inkişafına, eləcə də uzunmüddətli müqavilələr hesabına bazarda öz payının artırılmasına görə tam cavabdeh ofisə çevirmək niyyətindədir.
"SOCAR Trading"in Sinqapurda fəaliyyətinin genişləndirilməsi Qərbdən Şərqə mazutun arbitraj tədarükü və dünyadakı ən iri bunker limanına gəmi yanacağının satışı, eləcə də neftin saxlanması obyektlərin təmin olunması hesabına həyata keçiriləcək.
