Azərbaycan, Bakı, 17 dekabr /Trend, müxbir E.İsmayılov/
2011-ci ilin birinci rübündə ARDNŞ Xəzərin Azərbaycan sektorunda "Günəşli" yatağındakı "Günəşli-4" platformasında qaz-kompressor stansiyasının sahmanlanması işlərini başa çatdırmağı planlaşdırır. Bu barədə cümə günü ARDNŞ-nin Ekologiya İdarəsinin baş mühəndisi Yaqub Ağasıyev deyib.
Onun sözlərinə görə, yeni stansiyada bütün tikinti işləri və avadanlığın quraşdırılması artıq başa çatdırılıb və hazırda sazlama işləri aparılır.
"Sazlama işlərinin başa çatdırılması 2011-ci ilin birinci rübünə planlaşdırılıb. Bu işlər başa çatandan sonra stansiya istismara veriləcək", - Ağasiyev qeyd edib.
Yeni stansiyanın quraşdırılması yataqda sutkada atmosferə buraxılan 400 min kubmetr həcmdə aşağıtəzyiqli səmt qazının yığılması məqsədilə həyata keçirilir.
Əvvəllər infrastrukturun olmaması səbəbindən bu qaz atmosferə buraxılırdı, bu isə ətraf mühitə ciddi ziyan vururdu. Lazımi infrastrukturun yaradılmasının və bu layihənin həyata keçirilməsinin dəyəri 150 milyon dollar qiymətləndirilir. Tullantıların həcmi ildə 150-250 milyon kubmetr qaz arasında dəyişir.