Azərbaycan, Bakı, 18 mart /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) martın sonları-aprelin əvvəllərində "Bahar Energy Limited" şirkəti üçün ikiölçülü geofiziki tədqiqatlara başlayacaq. Bu barədə cümə günü ARDNŞ-dəki mənbə məlumat verib.
İşlər "Bahar-2" perspektiv strukturu ilə "Qum Dəniz" yatağı arasındakı geofiziki tədqiqatları nəzərdə tutur.
Mənbənin sözlərinə görə, ARDNŞ tərəfindən "Bahar Energy" üçün xidmətlərin göstərilməsi barədə razılaşma artıq əldə olunub.
"Bahar Energy" ilə razılaşma artıq əldə olunub. Hazırda işlər üçün lazım olan avadanlıqların hazırlanması aparılır", - mənbə bildirib.
Bundan əvvəl ARDNŞ "Bahar Energy Limited" şirkəti ilə Xəzər dənizinin Azərbaycan sektorunda yerləşən "Bahar" və "Qum Dəniz" dəniz yataqlarının daxil olduğu blokun kəşfiyyatına, reabilitasiyasına, işlənməsinə və hasilatına dair PSA (hasilatın pay bölgüsü) tipli müqavilə imzalayıb. Müqavilə artıq Azərbaycan Milli Məclisi tərəfindən təsdiq edilib.
ARDNŞ "Bahar Energy Limited" şirkəti arasında imzalanan müqavilənin ikinci hissəsində "Bahar-2" strukturunda kəşfiyyat işlərinin aparılması nəzərdə tutulur. Üç il müddətində bir kəşfiyyat quyusunun qazılması planlaşdırılır. Əgər ehtiyac yaranarsa, dördüncü il daha bir quyu qazıla bilər. "Bahar Energy Limited"in bu müqaviləyə qoyacağı investisiyaların həcmi, ilkin hesablamalara görə, bir milyard dollar təşkil edəcək.
