Azərbaycan, Bakı, 13 iyun /Trend, müxbir E.İsmayılov/
2015-ci ildə Azərbaycanda kiçik su elektrik stansiyalarının gücü 103 meqavata çatacaq. Bu barədə "Azərenerji" SC-nin (Azərbaycanda elektrik enerjisinin istehsalı və paylanması) məlumat materiallarında deyilir.
Kiçik su elektrik stansiyalarının tikintisi üzrə işlər Azərbaycanda alternativ və bərpa edilən enerji mənbələrinin inkişafı çərçivəsində aparılır.
Materiallarda deyildiyi kimi, 2012-ci ildə kiçik su elektrik stansiyalarının gücü 2011-ci ildəki 33 meqavata qarşı 46 meqavat təşkil edəcək.
"Ölkədə kiçik su elektrik stansiyalarının gücü tədricən artırılacaq, artıq 2013-cü ildə 62 meqavata, 2014-cü ildə isə 81 meqavata çatdırılacaq", - materiallarda deyilir.
Ötən il "Azərenerji" SC 18 milyard kilovat-saatdan artıq elektrik enerjisi istehsal edib.
"Azərenerji" SC-nin balanasında olan elektrik stansiyalarının istehsal gücü 6,4 min meqavat təşkil edir. Hazırda "Azərenerji" SC-nin balansında 200-dən artıq 500, 330, 220 və 110 kilovoltdan çox gücə malik yarımstansiya, eləcə də altı SES və 13 İES var.
