Azərbaycan, Bakı, 5 iyul /Trend, müxbir T.Cəfərov/
Regionun enerji təminatı məsələləri üzrə əməkdaşlıq əlaqələndirilsə, İran və Azərbaycan bir-birini tamamlaya bilərlər. Bu barədə Trend-ə İran parlamentinin Enerji komissiyasının üzvü Müəyyid Hüseyni Sədr deyib.
Sədr regiona və digər ölkələrə elektrik enerjisinin tədarükü üzrə birgə qərarların qəbul edilməsinin əhəmiyyətini qeyd edib.
"İran və Azərbaycan digər ölkələrin elektrik enerjisinə, neft, benzin və dizel yanacağına olan ehtiyacını və öz xalqlarının maraqlarını təmin etmək məqsədilə birgə qərarlar qəbul etməli və əməkdaşlığı genişləndirməlidirlər", - o deyib.
Parlament komissiyasının üzvü onu da qeyd edib ki, Xəzəryanı ölkələrin enerjidaşıyıcılarının "svop" sxemlər üzrə mübadiləsi bu dövlətlər üçün sərfəlidir və İran parlamenti bu təklifi dəstəkləyir.
Hazırda Azərbaycan Naxçıvan Muxtar Respublikasının qazla təmini üçün İrana yanacaq tədarük edir. İran isə öz növbəsində həmin yanacağı MR-ə ötürür.
Bundan başqa, Azərbaycan qazının İrana kommersiya əsasında tədarükü barədə danışıqlar gedir. İran ildə 5 milyard kubmetrədək Azərbaycan qazını almağa hazır olduğunu bildirib.
İran və Azərbaycan elektrik enerjisinin mübadiləsi məsələlərində də əməkdaşlıq edirlər. Bu məqsədlə elektrik enerjisinin tədarükü üçün qurğuların gücünün artırılması üzrə layihələr həyata keçirilir.
