Azərbaycan, Bakı, 2 noyabr /Trend, müxbir E.İsmayılov/
Bu ilin yanvar-sentyabr aylarının yekunlarına əsasən, Azərbaycan Respublikası Dövlət Neft Fondunun (ARDNF) investisiya portfelinin ümumi həcmi 32 milyard 238 milyon dollar təşkil edib ki, bu da aktivlərin ümumi həcminin 99,99 faizinə bərabərdir. Bu barədə çərşənbə günü Trend-ə Dövlət Neft Fondundan məlumat veriblər.
Məlumata əsasən, investisiya portfelinin 55,32 faizi dollarda (17 milyard 832,62 milyon dollar), 39,57 faizi avroda (9 milyard 432,39 milyon avro) və 5,11 faizi Britaniya funt-sterlinqində (1 milyard 57,33 milyon funt-sterlinq) cəmlənib.
Oktyabrın 1-nə olan vəziyyətə görə, ARDNF-nin aktivləri bu ilin əvvəli ilə müqayisədə 41,6 faiz (22 milyard 766,8 milyon dollar) artaraq 32 milyard 242,5 milyon dollar təşkil edib.
Dövlət Neft Fondu 1999-cu ildə yaradılıb və həmin vaxt onun aktivləri 271 milyon dollar təşkil edib.
