Azərbaycan, Bakı, 4 iyul /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) 2014-cü ildə öz neft emalı zavodlarında (NEZ) neft emalının dərinliyini 95 faiz artırmaq niyyətindədir. Trend-in məlumatına görə, bu barədə çərşənbə günü jurnalistlərə ARDNŞ-nin emal üzrə vitse-prezidenti David Məmmədov bildirib.
Onun sözlərinə görə, bu vaxtadək Azərbaycanda qazlaşdırmanın səviyyəsinin 90 faizədək çatdırılması prosesi tamamlanacaq ki, bu da ölkə üzrə mazutdan istifadəni xeyli azaldacaq və müvafiq olaraq, emalın dərinliyini artırmağa imkan verəcək. Bu gün mazut, həmçinin elektrik stansiyalarında ehtiyat yanacaq qismində istifadə edilir.
Hazırda neftin emal dərinliyi 92 faizdən çox təşkil edir. ARDNŞ-nin öz NEZ-lərində əldə etdiyi maksimum göstərici 93,5 faiz təşkil edib.