Azərbaycan, Bakı, 13 sentyabr /Trend, müxbir E.İsmayılov/
Hasilatın başlamasından (2006-cı ilin sonu) 2011-ci ilin sonunadək Xəzərin Azərbaycan sektorundakı "Şahdəniz" qaz-kondensat yatağından 30 milyard kubmetr qaz hasil edilib.
Trend-in məlumatına görə, bu barədə cümə axşamı BP-nin rəsmi saytında yerləşdirilən 2011-ci ilin yekunları üzrə davamlı inkişaf haqqında hesabatda deyilir.
Hesabata görə, qeyd edilən dövrdə yataqdan təqribən 8 milyon ton qaz-kondensat hasil edilib.
"Ümumilikdə 2011-ci ildə yataqdakı 4 quyudan 6,67 milyard kubmetr qaz və təqribən 1,8 milyon ton qaz-kondensat hasil edilib ki, bu da orta sutkalıq hesablamada təqribən 18,3 milyon kubmetr qaz və 300 barel kondensat təşkil edir", - hesabatda deyilir.
Qeyd edək ki, "Şahdəniz" yatağının ümumi ehtiyatları 1,2 trilyon kubmetr qaz həcmində qiymətləndirilir.