Azərbaycan, Bakı, 7 noyabr/ Trend, müxbir A.Axundov /
2012-ci ilin yekunları üzrə ARDNŞ-nin (Azərbaycan Respublikası Dövlət Neft Şirkəti) maliyyə-təsərrüfat fəaliyyətinin yekunları üzrə auditor hesabatının hazırlanması şirkətin neft-qaz yataqlarında ehtiyatların beynəlxalq qiymətləndirilməsini tələb edə bilər. Bu barədə çərşənbə günü Trend-ə şirkətin maliyyə məsələləri üzrə vitse-prezidenti Süleyman Qasımov bildirib.
"Bu məsələ hələ qaldırılmayıb,lakin 2012-ci ilin yekunları üzrə Ernst & Young şirkəti auditor hesabatının hazırlanması üçün şirkətin neft və qaz yataqlarında ehtiyatların beynəlxalq qiymətləndirilməsini tələb edə bilər. Bu qiymətləndirilmənin aparılması hər il tələb olunmur. Biz özümüz də "Ümid", "Abşeron" və başqa qaz yataqlarının kəşf olunması ilə əlaqədar yeni qiymətləndirilmənin aparılmasını istəyirik", - Qasımov deyib.
Onun sözlərinə görə, qiymətləndirici şirkətin müəyyən edilməsi məqsədilə tender elan edilə bilər.
"İndiyədək bizim yataqlarımızın qiymətləndirilməsi Amerikanın "Miller & Land" şirkəti tərəfindən həyata keçirilib. Qiymətləndirməni bu şirkətin aparması mümkündür. Amma bizim tender əsasında yeni qiymətləndirici müəyyən edəcəyimiz istisna deyil. Hazırda müvafiq şöbələrin əməkdaşları hazırlıq işləri aparırlar. Qiymətləndirmə auditor rəyinin təqdim olunmasınadək, yəni ilin birinci yarısında aparılır", - Qasımov bildirib.
