Azərbaycan, Bakı, 21 noyabr /Trend, müxbir E.İsmayılov/
Azərbaycanda istixana effekti yaradan qazların atmosferə buraxılmasının həcmi karbon qazı ekvivalentində 52,5 milyon ton təşkil edir. Trend-in məlumatına görə, bu barədə çərşənbə günü "Enerji səmərəliliyi: iqtisadi və institusional aspektlər və perspektivlər" adlı konfransda Azərbaycan Ekologiya və Təbii Sərvətlər Nazirliyinin İqlim Dəyişmələri və Ozon Mərkəzinin direktoru Gülmalı Süleymanov bildirib.
"Bu, dünyada atmosferə atılan istixana effekti yaradan qazların 0,1 faizə qədərini təşkil edir", - Süleymanov deyib.
Mərkəzin direktorunun qeyd etdiyi kimi, Azərbaycanda son 10 ildə ÜDM altı-yeddi dəfə artıb, bununla belə, istixana effekti yaradan qazların atmosferə buraxılmasının həcmi ildə 45-50 milyon ton səviyyəsində sabitləşdirilib.
Onun sözlərinə görə, enerji səmərəliliyinin təminatının tərkib hissəsi yanacağa qənaətdir ki, bu da öz növbəsində, əlavə gəlirlərin əldə olunması və zərərli qazların atmosferə buraxılmasının azaldılması deməkdir. Bu, yaşayış səviyyəsinin və əhalinin sağlamlığının yaxşılaşmasına müsbət təsir edir.
Süleymanovanın fikrincə, həmçinin, enerji səmərəliliyinin artımı çərçivəsində əhalinin həyat səviyyəsinin yaxşılaşması əhəmiyyətlidir ki, bu da elektrik enerjisindən daha effektiv istifadə üçün avadanlıq əldə etməyə imkan verəcək.
