2006-cı ilin yanvar-aprel aylarında Azərbaycan Dövlət Neft şirkəti tərəfindən (müştərək müəssisələr və əməliyyat şirkətləri istisna olmaqla) 39,191 min m həcmində qazma işləri həyata keçirilib ki, bu da 2005-ci ilin analoji dövrü ilə müqayisədə 10,211 min m azdır. Bu barədə Trend ə ARDNŞ-dən məlumat verilib.
Apreldə ARDNŞ (müştərək müəssisələr və əməliyyat şirkətləri istisna olmaqla) 10,773 min metr plana qarşı 14,099 min metr həcmində qazma işləri yerinə yetirib.
Bu il ARDNŞ işlənən yataqlarda 3 iri platforma quraşdırmaq niyyətindədir. Bunun ikisi "Neft Daşları", 1-i isə "Günəşli" yatağında qurulacaq. "Neft Daşları"nda quraşdırıldıqdan sonra bu platformalardan 48 quyu qazılacaq. Nəticədə neft hasilatı 25% artaraq 1 mln. ton təşkil edəcək.
2006-cı ilin yanvar-aprel aylarında ARDNŞ-in həyata keçirdiyi qazma işlərinin ümumi həcminin 38,941 min metri istismar quyularının payına düşür ki, bu da 2005-ci ilin analoji dövrü ilə müqayisədə 10,165 min metr azdır. Apreldə 10,613 min metr plana qarşı 14,099 min m istismar sahəsi qazılıb.
2006-cı ilin yanvar-aprel aylarında 250 metr kəşfiyyat sahəsi qazılıb ki, bu da 2005-ci ilin analoji dövrü ilə müqayisədə 46 metr azdır. Apreldə plan 160 m təşkil etsə də, kəşfiyyat quyularının qazılması həyata keçirilməyib.