...

ARDNŞ "Şahdəniz" layihəsi çərçivəsində kredit alacaq

Energetika Materials 23 İyun 2006 16:00 (UTC +04:00)

Azərbaycan Dövlət Neft Şirkəti (ARDNŞ) bir sıra banklarla kreditin alınması haqqında danışıqlar aparır ki, həmin kredit şirkətə "Şahdəniz" qaz kondensat yatağı layihəsi ilə bağlı Fransının Total şirkəti və AYİB qarşısındakı borcunu ödəməyə imkan verəcək. Bu barədə Trend ə ARDNŞ-nin prezidenti Rövnəq Abdullayev eksklüziv olaraq bildirib.

Bu kredit ARDNŞ-nin həmin layihədəki payının maliyyələşdirilməsi üçün Azərbaycana verilmiş vəsaitlərin qaytarılmasına yönəldiləcək. Hazırda 9 Avropa bankından üçü ilə danışıqlar aparılır. "Verilən kredit sindikatlaşdırılmış olacaq. Bu bir daha onu göstərir ki, ARDNŞ beynəlxalq maliyyə institutlarının etibarını qazana bilib" - deyə R.Abdullayev qeyd edib. Bu kreditin alınması ARDNŞ-yə Total və AYİB-yə faizlərin ödənilməsi məsələsində müsbət saldo əldə etməyə imkan verəcək.

ARDNŞ-nin rəhbəri deyib ki, bu kreditin şərtləri "Azəri-Çıraq-Günəşli" layihəsindəki payı maliyyələşdirmək üçün verilən kreditlə müqayisədə daha sərfəlidir.

Əvvəllər Azerbaijan (ACG) Limited (AzACG) $750 mln.həcmində sindikatlaşdırılmış kredit alıb Bu kredit dövlət zəmanəti olmadan verilib. ARDNŞ həmin kreditlə "Azəri-Çıraq-Günəşli" layihəsindəki payını geri alıb. Əvvəllər Exxon Azerbaijan Limited və Turkiye Petrolleri SC ARDNŞ-nin layihədəki 10%-lıq payını bölüşdürərək, bərabər həcmdə investisiya yatırırdı. Bu müddət ərzində şirkətlər $1 mlrd.150 mln. vəsait yatırıb. $750 mln. kredit alaraq AzACG Exxon Azerbaijan Limited və Turkiye Petrolleri SC-dən bu hüququ alıb. Vəsaitlərin bir hissəsi artıq hüququn alınmasına, digər hissəsi isə "AÇG" layişəsinə investisiyaların qoyulmasına yönəldilib. Kredit müqaviləsinə əsasən, Exxon Azerbaijan Limited və Turkiye Petrolleri SC tərəfindən ixrac edilən neft AzACG tərəfindən Glencore və Select Energy Trading (SET) şirkətlərinə satılacaq. Bu əməliyyatdan alınan gəlir BNP Paribas-ın (AzACG üçün kreditin təşkilatçısı və zəmanətçisi) xüsusi hesabında yerləşdiriləcək və buradan layihəyə investisiyalar qoyulacaq.

Kredit Libor +1,7% şərtlərilə verilir. Bu kredit neftin dünya bazarlarındakı qiymətindən asılı olaraq 3-5 ilə qaytarılacaq. Exxon Azerbaijan Limited və Turkiye Petrolleri SC-nin investisiyaları 4% dərəcəsilə qaytarılıb. Beləliklə, kredit ARDNŞ-yə 2,3%-lıq müsbət saldo əldə etməyə imkan verib.

Xəbər lenti

Xəbər lenti