ARDNŞ yüksək təzyiqli sualtı qaz kəmərinin inşasına başlayır
Azərbaycan prezidenti İlham Əliyevin enerji sektorunda vəziyyətlə bağlı keçirdiyi müşavirədə Azərbaycan Dövlət Neft Şirkətinə 2007-ci ildə qaz hasilatının həcminin 500 mln. kub metrdən 1 mlrd kub metrədək artımaq barədə tapşırıq verilib. Trend in xəbər verdiyi kimi, bu barədə ARDNŞ-dən məlumat verilib.
ARDNŞ "Günəşli" yatağında yeni yüksək təzyiqli qaz kəməri çəkəcək. Qeyd edək ki, şirkət qazın böyük hissəsini bu yataqdan hasil edir. Kəmərin inşasına iyulun 5-də "Süleyman Vəzirov" boru kəməri çəkmə gəmisindən başlanacaq.
"Günəşli" və "Neft daşları" yataqlarını birləşdirəcək qaz kəmərinin uzunluğu 22 km olacaq. Boru kəmərinin ümumi uzunluğunun 13 km-i artıq mövcud qaz kəmərini təşkil edir.
Bu kəmərin çəkilişində istifadə olunacaq borular artıq Bakıya gətirilib. Yeni qaz kəmərinin nəql gücü sutkada 2 mln. kub metr təşkil edəcək. Kəmərin çəkilməsi istiqamətində işlərin bu ilin payızında başa çatması planlaşdırılır.
