Hava şəraitinin pisləşməsi və güclü külək bəzi paylayıcı şəbəkələrin EÖX-nin zədələnməsinə səbəb olub. Trend in xəbər verdiyi kimi, bu barədə "Azərenerji" SC-dən məlumat verilib.
Hazırda SC bu ziyanın nəticələrinin aradan qaldırılması üzrə işlər görür. "Azərenerji"nin vitse-prezidenti Marlen Əsgərovun sözlərinə görə, rayon və şəhərləri təmin edən yüksək voltlu elektrik ötürücü xətləri zədələnməyib və fəaliyyət göstərir. Qəzalar konkret paylayıcı şəbəkələr daxilində lokal xarakter daşıyır.
Fövqəladə hadisələrin əsas səbəbi - küləyin yıxdığı ağacların kabelləri qırmasıdır. İyulun 3-dən yerli şəbəkələrin bütün təmir briqadaları səfərbər edilib. Yerlərə mərkəzləşdirilmiş qaydada əlavə avadanlıqlar tədarük olunur.
Hazırda Əlibayramlı, Gədəbəy və Sabirabad rayonlarının enerji ilə təchizatı tam bərpa olunub. İsmayıllı, İmişli, Salyan, Neftçala, Lənkəran, Masallı, Cəlilabad rayonlarında bəra işləri həyata keçirilir.