ABƏŞ bu ilin iyulunda Cənubi Qafqaz qaz kəmərində sınaq işlərinin həyata keçirilməsi üçün 19,08 mln. m3 qaz verib. Bu barədə Trend ə ARDNŞ-dən xəbər veriblər. 3 ay ərzində cəmi 37,5 mln. kub metr qaz verilib.
Cənubi Qafqaz qaz kəməri layihəsinin texniki operatoru olan BP şirkəti Səngəçal terminalında kəmərə qaz vurmaqla sınaq işlərinə başlayıb. Əvvəllər kəmərin tikintisi və hidropreslənməsi prosesi keçirilmişdir. İlk qaz sentyabrda nəql olunacaq.
Buraxılış-qəbul sınaqları üçün lazım olan qaz kəmərə mayın 21-də Səngəçal terminalında vurulub. Hazırda qurğu və avadanlığın presslənməsi və yoxlanılması prosesi gedir. Kəmərin Gürcüstan-Türkiyə sərhəddinə qədər olan hissəsində buraxılış-qəbul sınaqları avqustda Səngəçal terminalında qaz emalı qurğularına və "Şah-Dəniz" yatağında qazın hasil edilməsi üçün platformaya çəkilən dəniz kəmərlərinə qazın vurulmasından sonra başlanacaq.
"Şah-Dəniz" -Cənubi Qafqaz kəməri ixrac sisteminda sınaqların keçirilməsi üçün təxminən 0,1 mlrd. kub. metr qaz tələb olunacaq. Sınaqlar üçün "Azəri-Çıraq-Günəşli" yatağından hasil olunan ARDNŞ-nin səmt qazından istifadə olunur.