Azərbaycan, Bakı /müx. Trend A.İsmayılova/ Çərşənbə günü Azərbaycanın sənaye və energetika naziri Natiq Əliyev bildirib ki, hazırda Azərbaycan neft-kimya sənayesinin inkişafı üçün yeni texnologiyaların tətbiq olunması və sərmayələrin cəlb olunması üzərində işləyir. Onun sözlərinə görə, hazırda neft-kimya sənayesi "Etilen-Poligtilen-300" zavodunun qurğularına əsaslanıb.
Azərbaycanda yeni neft-kimya kompleksinin tikintisi məsələsinə toxunaraq nazir bildirib ki, əvvəlcə xüsusi proqram hazırlamaq lazımdır. "Hələ ki, heç bir tikinti işləri aparılmır. Biz neft-kimya sahəsini təhlil etməliyik" - deyə Əliyev bildirib.
Neft-kimya kompleksini 10 il ərzində üç mərhələdə tikmək planlaşdırılır. Artıq birinci mərhələdə məhsul əldə etmək, ikinci mərhələdə məhsulun çeşidini artırmaq mümkün olacaq, üçüncü mərhələdə isə bu işləri daha da genişləndirmək nəzərdə tutulur. Birinci mərhələ qərarın qəbulundan sonra 2-3 ilə həyata keçirilə bilər.
Neft-kimya kompleksinin mövcud olacağı yerlərdən biri kimya zavodlarının artıq fəaliyyət göstərdiyi Sumqayıt şəhəridir.
Neft-kimya kompleksinin ilkin dəyəri 500 mln. dollar dəyərində qiymətləndirilib. Yekun dəyər son hesabatda müəyyən ediləcək.