Azərbaycan, Bakı / Trend / "Sumqayıtelektrikşəbəkə" ASC-nin debitor borcları 44,3 mln. manat təşkil edir, onlardan 74,9 faiz əhali arasındakı abunəçilərin payına düşür. Bu barədə məlumat verən ASC-nin sədri Fəxri Məmmədov bildirib ki, əhalinin borcu 33,2 mln. manata bərabərdir.
Əvvəllər Sumqayıtın paylayıcı şəbəkələri Türkiyənin "Barmek" şirkətinin idarəçiliyində idi. Müvafiq şərtlər yerinə yetirilmədiyi üçün bu şirkətlə müqavilə pozulmuşdu.
Məmmədovun sözlərinə görə, türk şirkətinin vaxtında yığılan debitor borcları nəzərə alınmaq şərti ilə ümumi borc 160,6 mln. manat təşkil edir. Bu məbləğin 106,8 milyonu əhali, 53,8 milyonu isə abunəçilərin digər qruplarının payına düşür.
Hazırda ASC-nin abunəçilərinin sayı 236,885 mindir (214,679 min - əhali və 22,206 min - digərləri). Abunəçilərin ümumi sayından 75 faiz elektrik sayğaclarla təmin olunub.
"Sumqayıtelektrikşəbəkə" ötən ilin noyabrından fəaliyyət göstərir.
