Azərbaycan, Bakı, 21 oktyabr/ Trend , müxbir S.Babayeva/ Rabitə və İnformasiya Texnologiyaları Nazirliyi "Xalq kompüteri" layihəsinə düzəlişlərin üzərində işləyir, -idarədən bildiriblər.
Layihənin realizəsi üçün Rabitə Nazirliyində İntel və Microsoft Korporasiyalarının iştirakı ilə xüsusi işçi qrupu yaradılıb.
"Layihənin ilkin varinatı işçi qrupu tərəfindən nəzərdən keçirilir, tərəflər onun realizə imkanları və şərtlərini razılaşdırırlar", - nazirlikdən bildiriblər.
Layihənin son versiyası üzərində işlərin başa çatacağı tarix və edilən düzəlişlər açıqlanmır.
Layihə kompüterlərin aşağı faiz dərəcələri ilə uzunmüddətli kreditə verilməsi yolu ilə əhalinin aztəminatlı təbəqələrinin kompüterlərlə təminatına yönəlib. Güman edilir ki, Microsoft layihənin realizəsi üçün lisenziyalaşdırılmış proqram təminatı, İntel isə güzəştli əsasda müvafiq avadanlıq təqdim edəcək.
Rabitə Nazirliyinin təxmini hesablamalarına görə, bu gün Azərbaycanda hər 100 nəfərə 3 - 4 kompüter düşür. Yeni layihə müvəffəqiyyətlə realizə edilərsə, bu rəqəmi beş dəfədən çox artırmaq mümkün olacaq.
İdarədə ümid edirlər ki, ilin sonunadək Azərbaycanın regionlarından birində sınaq layihənin realizəsi başlayacaq.
Müəlliflə əlaqə saxlamaq üçün elektron ünvan: [email protected]