Azərbaycan, Bakı, 12 mart / Trend , müxbir S.Babayeva /
"Maliyyə xidmətlərinin inkişafı" layihəsi çərçivəsində Azərbaycanın poçt operatoru "Azerpocht" tərəfindən korporativ informasiya şəbəkəsinin tətbiqi 2009-cu ilin sonunda başa çatacaq, - Hewlett Packard-ın (HP) MDB üzrə baş direktoru Rubi Kozak deyib.
Avtomatlaşdırılmış maliyyə-poçt əməliyyat sisteminin hazırlayıcısı HP, Colvir və Sinam konsorsiumudur.
"Bu günə qədər işlərin 60-70 faizi artıq görülüb", - Kozak deyib.
"Sistem müxtəlif modullardan ibarətdir və artıq birinci modul (avtomatik mühasibat uçotunun hazırlanması) çərçivəsində Bakının 100-dən çox şöbəsi sistemə qoşulub. İkinci modul - pul köçürmələri üzrə işlər artıq baş çatdırılır və poçt xidmətləri üzrə üçüncü modul tətbiq olunmaqdadır", - bir müddət əvvəl Azərbaycan Rabitə və İnformasiya Texnologiyaları Nazirliyindən məlumat verilib.
Sistemin tətbiqindən sonra "Azerpocht" paytaxtda, sonra isə regionlarda bank maliyyə xidmətləri göstərməyə başlayacaq.
Əsas komponenti ölkənin poçt sisteminin təkmilləşdirilməsi olan "Maliyyə xidmətlərinin inkişafı" layihəsinin qiyməti 17,5 milyon dollardır. Dünya Bankı bu layihə üçün 12,25 milyon dollarlıq kredit ayırır, digər hissə isə Azərbaycan hökumətinin payına düşür. Layihənin məqsədi maliyyə xidmətlərinin həyata keçirilməsi üçün poçt şəbəkəsinin təkmilləşdirilməsidir.
Məqalə müəllifi ilə əlaqə ünvanı: [email protected]