Azərbaycan, Bakı, 18 may / Trend , müxbir S.Babayeva /
Cari ilin əvvəlindən etibarən Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsi (DRİ) radio-elektron vasitələrin (REV) texniki baxışını, eləcə də 168 idarə və təşkilatda möhürlənmiş avadanlığın təkrar baxışını keçirib.
"Bununla yanaşı, möhürlənmiş VSAT tipli yerüstü peyk terminallarının baxışdan keçirilməsi ilə bağlı işlər aparılıb", - DRİ məlumat verib.
Texniki baxış zamanı DRİ-də qeydiyyatda olmayan 651 müxtəlif tipli REV qeydə alınıb. Onlardan 357-si qeydiyyatdan keçirilib, 200-ü ilə bağlı qeydiyyat işləri aparılır və 94 radio-elektron vasitə möhürlənib.
Aşkar edilmiş çatışmazlıqlar əsasında DRİ qeydiyyatdan keçirilməyən cihaz istifadəçilərinə qarşı 46 protokol tərtib edib.
Dövlət Radiotezliklər İdarəsi Azərbaycan ərazisində rabitə tezliklərinin istismarı, eləcə də müəssisə, təşkilat və dövlət orqanları tərəfindən tezliklərin istifadəsinə nəzarət edir.
Məqalə müəllifi ilə əlaqə ünvanı: [email protected]
