Azərbaycan, Bakı, 18 avqust / Trend , müxbir H.Vəliyev /
"Azərbaycanın Rabitə və İnformasiya Texnologiyaları Nazirliyi (RİTN) mobil rabitə operatorlarının 3G standartı üzrə mobil rabitə xidmətlərinin göstərilməsi üçün lisenziyaların verilməsi barədə müraciətlərini nəzərdən keçirəcək", - nazirliyin məlumatında deyilir.
Qurumun məlumatına görə, üçüncü nəsil şəbəkə xidmətlərinin göstərilməsi üçün operatorlara yeni standart üzrə texniki hazırlıq səviyyəsinə çatmaq lazımdır. Bunun üçün şəbəkə avadanlıqları və baza stansiyalarının təkmilləşdirilməsi həyata keçirilməlidir.
Operatorların özləri yeni rabitə standartlarına keçidə texniki cəhətdən hazır olduqlarını və bütün tələblərə cavab verdiklərini bildirirlər. Operatorlar üçüncü nəsil standartlarının tətbiqi üçün LTE (Long Term Evolution) texnologiyalarını nəzərdən keçirirlər. Bu texnologiya giriş kanalında (baza stansiyasından istifadəçiyə qədər) 300 Mbit/s, çıxışda 75 Mbit/s sürətli məlumatların paketli ötürülməsi üçün optimallaşdırılmış, yüksək sürətli mobil rabitə sistemlərinin yaradılması imkanlarını texniki cəhətdən təmin edir.
LTE texnologiyasının tətbiqi operatorlara kapital və əməliyyat xərclərini, şəbəkədən istifadənin ümumi qiymətini azaltmaq, xidmət və texnologiyaların konvergensiyası sahəsində öz imkanlarını genişləndirmək, məlumatların ötürülməsi üzrə xidmətlərin göstərilməsindən gəlirləri artırmaq imkanı verəcək.
Əslində Azərbaycanda üçüncü nəsil şəbəkəyə keçid hansısa dəyişiklik və abunəçinin ziyanına olmadan baş verəcək. 3G texnologiyalarının birbaşa üstünlükləri deyiləndə, mobil televiziya, videotelefon, internet şəbəkəsinə çıxış, həcmli kontentin (fayl) alınması və göndərilməsi və b. yüksək texniki xidmətlərin göstərilməsi nəzərdə tutulur.
Mobil rabitə bazarının iştirakçıları əmindirlər ki, yaxın iki il 3G şəbəkələri üçün baza illəri olacaq.
Məqalə müəllifi ilə əlaqə ünvanı: [email protected]