Azərbaycan, Bakı 4 may /Trend, müxbir H.Vəliyev/
Azərbaycan Milli Elmlər Akademiyasının Kibernetika İnstitutu Azərbaycan Fövqəladə Hallar Nazirliyi üçün proqnozlaşdırmanın monitorinq sisteminin tətbiqi üzrə təkliflər paketinin hazırlanması ilə bağlı işlər aparır. Bu barədə Trend-ə İnstitutun direktoru Telman Əliyev çərşənbə axşamı məlumat verib.
Əliyevin sözlərinə görə, bu günədək artıq nazirlik tərəfindən monitorinq sisteminin tətbiq olunmaq üçün səmərəliliyini təsdiqləyən sənəd təqdim olunub. İnstitutun təkliflərində müxtəlif sahələrdə, eləcə də tikilməkdə olan və ya hazır bina və obyektlərin texniki vəziyyətinin öyrənilməsində monitorinq sisteminin istifadəsi üzrə işlərin nəticələri nəzərə alınacaq.
Bu sahədə monitorinq sisteminin tətbiqi qapalı dövrdə qüsurların yaranmasını (qaz sızması, elektrikötürücü xətlərində qapanmalar və s.) və onların meydana çıxması səbəblərini öyrənməyə imkan verəcək. Binalarda quraşdırılan ötürücülər mərkəzi monitorinq sisteminə lokal şəbəkə vasitəsilə operativ informasiya ötürəcək, bundan sonra onların texniki vəziyyəti təhlil olunacaq. İnstitutun elmi işləri bir sıra yaşayış və sənaye massivlərinin texniki vəziyyətinin kompleks təhlilinə də imkan verəcək.
"Paytaxtda seysmik aktiv zonalar və qurunt sularının səviyyəsinin yüksək olduğu zonalar mövcuddur ki, bu da tikilməkdə olan sənaye və yaşayış obyektlərinə mənfi təsir göstərir. Əgər bir neçə binanın texniki vəziyyəti eyni vaxtda dəyişərsə, o zaman bu, anomaliyalardan və seysmik aktivlikdən xəbər verir", - Əliyev deyib.
Sistem qəza vəziyyətləri barədə vaxtında məlumat verməyə qadirdir ki, bu da öz növbəsində onların vaxtında aradan qaldırılmasına imkan verir.
