Azərbaycan, Bakı, 11 iyun /Trend, müxbir H.Vəliyev/
AzeriCard prosessinq mərkəzi American Express plastik kartları sahiblərinə online-tranzaksiyaların həyata keçirilməsi imkanı verəcək. Bunu Trend-ə AzeriCard-ın biznesin inkişafı üzrə başçısı Cahangir Məmmədov deyib.
Məmmədovun sözlərinə görə, bu gün mərkəz American Express sistemində sertifikatlaşdırmadan keçir.
Sistemdə şəxsi məlumatın, hesablamaların və ödənişlərin təhlükəsizliyinin yüksək səviyyəsi təmin ediləcək. Avtorizasiya və pulların köçürülməsinə görə cavabdeh American Express məlumat sistemi 3D Secure texnologiyası üzrə sertifikatlaşdırılıb. Daxil edilən informasiyanın ötürülməsinin təhlükəsizliyinə SSL protokolunun və Thawte sertifikatının istifadəsi zəmanət verir.
American Express sistemi qərb bazarında daha çox ehtiyac duyulan ödəmə sistemidir. Bu sistem korporativ müştərilərə xidmət göstərilməsinə görə ən öncül mövqeləri tutur.
American Express kartları üzrə ödənişlərin qəbulunun başlanması online-alış xidmətlərinin imkanlarını əhəmiyyətli dərəcədə genişləndirəcək və Azərbaycanda elektron ticarətin gələcək inkişafına kömək edəcək.
