Azərbaycan, Bakı, 3 avqust /Trend, müxbir H.Vəliyev/
Azərbaycan "Şərq-Qərb" informasiya supermagistralının tikintisi layihəsi ilə bağlı Türkiyə hökumətinin dəstəyinə ümid edir. Bu barədə çərşənbə axşamı Azərbaycanın rabitə və informasiya texnologiyaları naziri Əli Abbasov Türkiyənin nəqliyyat naziri Bineli Yıldırımla görüşdə deyib.
Abbasovun sözlərinə görə, hazırda layihənin həyata keçirilməsində "China Telecom", "Rostelekom", "Qazaxtelekom" kimi iri şirkətlər maraqlıdır, İran, Gürcüstan və Türkiyə tərəfləri ilə danışıqlar aparılır.
"Azərbaycan tərəfi hökumətin siyasi dəstəyini aldıqdan sonra bu layihə çərçivəsində əməkdaşlığa hazır olduğunu bildirən "Türktelekom"la dəfələrlə danışıqlar aparıb", - Abbasov qeyd edib.
Abbasov hesab edir ki, bu məsələnin müsbət həllinə Türkiyənin nəqliyyat və rabitə nazirlikləri yardım edə bilərlər və bununla əlaqədar öz türkiyəli həmkarının köməyinə ümid edir.
Yıldırım öz növbəsində bu layihəni dəstəkləməyə hazır olduğunu bildirib. Abbasov bu məsələni hər iki ölkənin hökumətləri səviyyəsində qaldırmağı və Türkiyə Prezidenti Abdullah Gülün Bakıya səfəri çərçivəsində keçiriləcək müzakirələrin gündəliyinə daxil edilməsini təklif edib.