Azərbaycan, Bakı, 6 sentyabr /Trend, müxbir H.Vəliyev/
Azərbaycan telekommunikasiya rabitə və informasiya texnologiyaları üzrə sentyabrın 15-16-da Aşqabadda keçiriləcək "TurkmenTEL-2010" IV Türkmənistan Beynəlxalq sərgi-konfransının işində milli pavilyonla təmsil olunacaq. Bu barədə Trend-ə bazar ertəsi Azərbaycan Rabitə və İnformasiya Texnologiyaları Nazirliyindən bildiriblər.
Nazirliyin məlumatına görə, sərgidə Azərbaycanı "Sinam" şirkəti, R.I.S.K. BB&TV, Dilmanc layihəsi və Azərbaycan Milli Elmlər Akademiyasının Kibernetika İnstitutu təmsil edəcək.
Azərbaycan nümayəndə heyətinə rabitə və informasiya texnologiyaları nazirinin müavini Elmir Vəlizadə başçılıq edəcək.
Milli pavilyonda Azərbaycanın informasiya-kommunikasiya texnologiyaları sahəsində nailiyyətləri nümayiş olunacaq.
"TurkmenTEL-2010" sərgi-konfransının işində 300 nümayəndənin iştirakı gözlənilir. Onlar hökumətlərarası əməkdaşlıq, xarici investisiyalar üçün imkanlar, Türkmənistanın və bütün regionun kommunikasiya texnologiyaları və sənayesinin gələcək inkişaf məsələlərini müzakirə edəcəklər.
Konfransın işi zamanı mobil rabitə, genişzolaqlı internet, elektron hökumət, qanunvericilik qaydalarının hazırlanması və s. üzrə 30 əlavə təqdimatın keçiriləcəyi gözlənilir.
