Azərbaycan, Bakı, 14 oktyabr /Trend, müxbir H.Vəliyev/
2011-ci ildə Azərbaycanda informasiya-kommunikasiya texnologiyaları (İKT) sektorunda artım tempi 18,5% təşkil edəcək. Bu barədə iqtisadi inkişaf naziri Şahin Mustafayev Milli Məclisin plenar iclasında 2011-ci il dövlət büdcəsi layihəsinin müzakirəsində bildirib.
Mustafayevin sözlərinə görə, sonrakı üç ildə Azərbaycanda İKT sektorunda illik artım tempi 17,4 faiz təşkil edəcək.
Ümumilikdə İKT infrastrukturunun inkişafı üzrə tədbirlərin həyata keçirilməsi sayəsində istehlakçıların müasir texnologiyalar bazasının xidmətlərindən istifadə imkanları yaranıb. Bu sahədə çalışan sahibkarlar isə öz bizneslərini ölkə sərhədlərindən kənarda genişləndirməyə başlayıblar.
Rabitə və İnformasiya Texnologiyaları Nazirliyinin statistik məlumatına görə, respublikanın qeyri-neft sektorunda İKT-nin payı 2008-ci ildəki 4,2 faizdən hazırkı 4,4 faizədək artıb. Əgər 2008-ci ildə ölkənin ÜDM-də İKT gəlirlərinin payı 1,6 faiz təşkil edirdisə, 2009-cu ildə bu göstərici iki faizə çatıb.
Nazirliyin məlumatına görə, ilin birinci yarısının yekunları üzrə ÜDM-də İKT sektorunun gəlirlərinin payı üç faiz təşkil edib. Altı ay ərzində İKT sektoru üzrə əldə olunan gəlirlərin ümumi həcmi 4,4 dəfə artıb.
