Azərbaycan, Bakı, 13 noyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi ümumi istifadəli regional telefon şəbəkəsinin nömrə tutumunu 13,5 min ədədə qədər artırıb. Bu barədə nazirlikdən məlumat verilib.
Məlumata görə, operator tərəfindən həmçinin, genişzolaqlı internet üçün 3,2 mindən çox port istismara verilib.
Operator tərəfindən nömrə tutumunun genişlənməsi üzrə işlər Biləsuvar, İsmayıllı, Bərdə, Göyçay, Xaçmaz, Lerik, Beyləqan və Lənkəranda mərkəzi və kənd ATS-lərində gerçəkləşdirilib.
Bakı Telefon Rabitəsi İstehsalat Birliyi Bakı və regionlarda beş min yeni telefon nömrəsi və 11 mindən çox genişzolaqlı internet portunun istifadəyə verilməsini elan edib.
Bütövlükdə ilin əvvəlindən nazirlik tərəfindən regional və paytaxt telekommunikasiya qovşaqlarının montaj tutumunun bərpası və genişlənməsinə 16 milyon manatdan çox investisiya qoyulub.
Bu günə Azərbaycanın elektron ATS-lərində xüsusi çəki 92,9 faizə çatıb. Bu göstərici paytaxt üzrə 95,3 faiz, respublikanın digər regionları üzrə 90,4 faiz təşkil edir.
Hər 100 nəfərə düşən telefonların ümumi sayı bütün respublika üzrə 16,2 ədəd təşkil edir.
