Azərbaycan, Bakı, 1 fevral /Trend, müxbir H.Vəliyev/
Azərbaycanın "İntelsoft" İT şirkəti rus dilindən Azərbaycan dilinə maşın tərcüməsinin beşinci versiyasını təqdim edib. Bu barədə Trend-ə çərşənbə axşamı "İntelsoft" şirkətinin direktoru Emin Nuriyev məlumat verib.
"İntelsoft"un tərcüməçisinin beta-versiyası ilk dəfə Azərbaycanın 16-cı "Bakutel-2010" beynəlxalq telekommunikasiya sərgisi çərçivəsində nümayiş olunub.
Nuriyevin sözlərinə görə, maşın tərcüməçisinin yeni versiyasında mətnin tərcüməsinin keyfiyyəti artırılıb.
"Bu gün mətnin tərcüməsinin keyfiyyətinin artırılması məqsədilə İKT və tibb sahələri üzrə əlavə terminologiyalar hazırlanır, perspektivdə digər sahələrin də əhatə edilməsi nəzərdə tutulub. Həmçinin, sistemin funksiyalarına başqa dillərin də daxil edilməsi planlaşdırılır", - Nuriyev bildirib.
Sistemin online-versiyası http://translate.intelsoft.az ünvanı üzrə yerləşdirilib və beş min işarəyədək mətni tərcümə etməyə imkan verir, lüğət bazası isə daim təkmilləşir. Offline-versiya mətnlə işləmək üçün böyük imkanlara malikdir və Windows, Mac OS X və Linux əməliyyat sistemləri mühitində fəaliyyət göstərir.