Azərbaycan, Bakı, 2 aprel /Trend, müxbir H.Vəliyev/
Azərbaycanda "Facebook" sosial şəbəkəsi istifadəçilərinin sayı 324 880 nəfər təşkil edir. Trend-in məlumatına görə, bu barədə "Facebakers" araşdırma şirkətinin aprelin 2-nə olan vəziyyətə dair hesabatında deyilir.
Birinci rübün yekunlarına görə, Azərbaycanda sosial şəbəkə istifadəçilərinin sayı 16,4 faiz (45 780 nəfər) artıb.
"Facebook"un Azərbaycan seqmenti daxil olanlar reytinqində 96-cı yerdədir. "Facebook" şəbəkəsindən Azərbaycan əhalisinin 3,91 faizi istifadə edir. Bu, yanvarın əvvəli ilə müqayisədə 0,55 faiz çoxdur.
Azərbaycanın internet istifadəçilərinin ümumi sayı arasında sosial şəbəkə istifadəçilərinin sayı 1,24 faiz artaraq 8,81 faiz təşkil edib.
İstifadəçilərin ümumi sayının 63 faizini kişilər, 37 faizini qadınlar təşkil edir.
Daxil olanların sayı üzrə birinci yer 18 yaşdan 24-dək (50 faiz) olan istifadəçilərə, təxminən yarısı 25-dən 34-dək (26 faiz) yaş kateqoriyasından olanlara, üçüncü yer isə 16-dan 17-dək (9 faiz) yaş kateqoriyasından olan auditoriyaya məxsusdur.
13-15, 35-44 və ondan yuxarı yaş kateqoriyalarının payına altı faiz düşür, iki faiz 45-54 yaş və yalnız bir faiz 55-64, 65 və ondan yuxarı yaş kateqoriyasından olan istifadəçilərin payına düşür.
Azərbaycan "Facebook" sosial şəbəkəsi istifadəçilərinin sayına görə Qazaxıstan (268 160),Latviya (267 800 istifadəçi), Belarus (250 960), Moldova (180 120), Ermənistan (135 120), Özbəkistan (63 000), Qırğızıstan (42 020), Tacikistan (14 660) və Türkmənistan (12 700) kimi ölkələri qabaqlayır.
"Facebakers"in versiyasına görə, ölkələrin ilk beşliyinə ABŞ, İndoneziya, Böyük Britaniya, Türkiyə və Filippin daxildir.
"Facebook" istifadəçilərinin ümumi sayı 642 613 700 nəfər təşkil edir.
"Facebook" şəbəkəsi 2004-cü il fevralın 4-dən fəaliyyətə başlayıb. Bu gün servisdən dünyanın 60 dilində, eləcə də Azərbaycan dilində istifadə olunur.
