Azərbaycan, Bakı, 18 aprel /Trend, müxbir H.Vəliyev/
İlin əvvəlindən üç ay ərzində Azərbaycan Rabitə və İnformasiya Texnologiyaları Nazirliyi tərəfindən İKT və poçt rabitəsi sektoruna 33 milyon manat investisiya qoyulub. Trend-in məlumatına görə, bu barədə nazirliyin birinci rübün yekunları üzrə hazırladığı hesabatda deyilir.
Nazirliyin müəssisə və strukturları tərəfindən qoyulan investisiyanın həcmi 23,14 milyon manat təşkil edib.
Birinci rübün yekunları üzrə ölkədə ümumi nömrə tutumu 1937 nömrə olan yeni ATS-lər istismara verilib. Nazirliyin statistik göstəricilərinə əsasən, hazırda büütn respublika üzrə ATS şəbəkəsinin nömrə tutumu 1 665 128 ədəd təşkil edir.
Rabitə Nazirliyinin regional qovşaqlarının yenidən qurulmasına 688 min manat, Bakının telefon rabitəsinin modernləşdirilməsinə isə 1,1 milyon manat investisiya yatırılıb.
Yaxın vaxtlarda "Bakı Telefon Rabitəsi" İstehsalat Birliyi bütün telefon şəbəkəsinin elektronlaşdırılması üzrə işləri başa çatdıracaq. Hazırda 438/439/494/495 saylı ATS-lərin yenidən qurulması üzrə işlər artıq başa çatıb. Onların hər birinin nömrə tutumu 20 min ədəd təşkil edir.
Hazırda 494/495 saylı ATS-lərdə analoq nömrələrin sayı 8,5 min, 438/439 saylı ATS-lərdə isə 11 min təşkil edir.
"Bakı Telefon Rabitəsi"nin şəbəkəsi aprelin sonunadək tam elektron şəklə salınacaq.
Bu müddət ərzində 494/495 saylı ATS-lərdə beş min nömrə və 438/439 saylı ATS-lərin bütün abonent nömrələri yeni telefon stansiyalarına keçiriləcək. Yeni ATS-lər gələcək nəsil şəbəkəsi bazasında (NGN - NextGenerationNetwork) yaradılıb.
Nazirliyin statistikasına əsasən, hazırda hər 100 nəfərin payına düşən telefonların ümumi sayı bütün respublika üzrə 16,26 ədəd təşkil edir. Paytaxt üzrə bu göstərici 34,96 ədəd, respublikanın digər regionları üzrə 10,69 ədəd, kənd yerlərində isə 7 ədəd təşkil edir.