Azərbaycan, Bakı, 24 iyun /Trend, müxbir H.Vəliyev/
Regional İnformasiya Texnologiyaları Akademiyası (RITA - Regional Information Technologies Academy) gələn həftədən konkret layihələrin hazırlanmasına və Avropa ölkələrinin elmi cəmiyyətləri və təşkilatları ilə onların gələcəkdə həyata keçirilməsi məqsədilə konsorsiumların yaradılmasına başlayır. Bu barədə cümə günü Trend-ə RITA direktoru Tofiq Babayev məlumat verib.
Babayevin sözlərinə görə, bu istiqamətdə işlər artıq ilin sonuna başa çatdırılmalıdır.
"İyunun 16-17-də Gürcüstanda keçirilən "Şərqi Avropa və Cənubi Qafqaz ölkələrində informasiya cəmiyyətinə doğru yolda: üstünlüklər və çağırışlar" adlı regional konfransda Azərbaycan Avropa Komissiyasının "İnformasiya və kommunikasiya texnologiyaları (ICTFP 7)" mövzusunda 7-ci çərçivə proqramının 8-ci müsabiqəsində iştirak etmək üçün azərbaycanlı alimlərin 4 elmi layihəsini təqdim edib", - Babayev bildirib.
Birinci layihə - elektrik kompozitlərin polimerinin hibridinə əsaslanan aktiv materialların yeni sinfinin hazırlanması (Fizika İnstitutu).
İkinci layihə - robast texnologiyasından və səs monitorinqi nəzəriyyəsindən istifadə etməklə ürək-damar sisteminin monitorinqi üçün mobil proqram-texniki kompleksin hazırlaması (Kibernetika İnstitutu).
Üçüncü layihə - elektrik enerjisi resurslarının optimal nəzarət sistemi ("Kiber" şirkəti).
Dördüncü layihə - mədəniyyət abidələrinin üçölçülü təsvirlərinin yaradılmasını nəzərdə tutan Zaqatala regional İKT mərkəzinin mədəni irsinin qorunub saxlanması.
Bu layihələr avropalı tədqiqatçılarda ciddi maraq doğurub və onlar artıq azəbaycanlı alimlərlə konsorsiumda çalışmaq üçün istəklərini ifadə ediblər.
Bu qurğuların işlənib hazırlanması və təcrübə nümunələrinin hazırlanması ən azı üç il vaxt aparacaq və əgər elmi layihələr lazımi dəstəyi əldə etsələr, bu, onların kommersiyalaşdırılacağı və dünya bazarlarına çıxarılacağı deməkdir.