Azərbaycan, Bakı, 19 sentyabr /Trend, müxbir H.Vəliyev/
Avstriya Azərbaycanın "Azerspace" telekommunikasiya peykinin imkanlarından istifadə etməkdə maraqlıdır. Bu barədə bazar ertəsi jurnalistlərə Azərbaycanın Rabitə və İnformasiya Texnologiyaları Nazirliyinin Beynəlxalq münasibətlər şöbəsinin müdiri Ayaz Bayramov bildirib.
Onun sözlərinə görə, bu məsələ iki ölkə arasında aparılan danışıqlar çərçivəsində gündəlikdədir.
"Məsələ kommersiya xarakteri daşıyır. Bununla əlaqədar bu sahədə araşdırmaların aparılması və əməkdaşlığın perspektivlərinin öyrənilməsi planlaşdırılır", - Bayramov deyib.
Azərbaycan orbitə iki peykin buraxılmasına hazırlaşır. İlk telekommunikasiya peyki Azerspace geostasionar orbitə 2012-ci ilin sonlarında çıxarılacaq.
Azerspace-in istehsalçısı ABŞ-ın "Orbital Sciences Corporation" şirkətidir. Peyk Malayziyanın peyk operatoru "MEASAT" şirkətindən icarəyə götürülən 46 dərəcə şərq uzunluğu dairəsində yerləşəcək. Peykin orbitə yerləşdirilməsi ilə Fransanın "Arianspace" şirkəti məşğul olacaq.
İkinci peykə gəlincə, o, alçaqorbitli olacaq və ondan kartoqrafiya işləri, geoloji tədqiqatlar və sair işlərdə Yerin məsafədən qavranılması üçün istifadə olunacaq. Onun 2014-cü ildə orbitə göndərilməsi gözlənilir.