Azərbaycan, Bakı, 23 dekabr /Trend, müxbir E.İsmayılov/
Azərbaycan Rabitə və İnformasiya Texnologiyaları Nazirliyi 2012-ci il ərzində ölkənin rəqəmsal yayımla tam əhatəsini təmin etmək niyyətindədir. Trend-in məlumatına görə, bu barədə cümə günü jurnalistlərə rabitə və informasiya texnologiyaları nazirinin müavini İltimas Məmmədov deyib.
Onun sözlərinə görə, bununla bağlı böyük işlər görülüb, lazımi avadanlıq alınıb. Nazirlik, xüsusilə, yanvar-fevralda zəruri avadanlığı Naxçıvan MR-də quraşdırmaq niyyətindədir.
"Bundan sonra ölkə üzrə rəqəmsal yayımın əhatəsinin monitorinqi keçiriləcək və onun yayılmadığı ərazilər aşkar edildikdə müvafiq işlər görüləcək", - Məmmədov bildirib.
Paketə 12 yerli və müraciət əsasında seçiləcək hərəsindən biri olmaqla rus və türk kanalları daxil olmalıdır.
Məmmədovun sözlərinə görə, nazirlik artıq əhalini MPEG4 formatında işləyən televizorlar almağa çağıran videoçarxlar nümayiş etdirib. Burada məqsəd yeni yayıma keçid prosesini asanlaşdırmaqdır.
"Müvafiq strukturlara müraciətlər təqdim edilib ki, analoq yayım prinsipi üzrə işləyən televizorların ölkəyə gətirilməsi məhdudlaşdırılsın. Lakin bu proses kifayət qədər çətindir, çünki ölkəyə televizorların gətirilməsi ilə məşğul olan bir çox şirkətlərin müqavilə və öhdəlikləri var", - nazir müavini vurğulayıb.
