Azərbaycan, Bakı, 21 yanvar /Trend, müxbir H.Vəliyev/
2011-ci ildə İKT sektorunda investisiyaların ümumi həcmi 415 milyon manat təşkil edib ki, bu da 2010-cu ilin göstəricisindən ikiqat artıqdır. Trend-in məlumatına görə, bu barədə şənbə günü Azərbaycan Rabitə və İnformasiya Texnologiyaları Nazirliyinin ötən ilin yekunları üzrə hesabatında deyilir.
"Sektora qoyulan investisiyaların ümumi həcmindən mobil rabitə operatorlarının payına 264,4 milyon manat, Rabitə Nazirliyinin struktur bölmələrinin payına isə 144,5 milyon manat düşüb", - hesabatda qeyd edilir.
Hesabata əsasən, ölkə üzrə ümumi nömrə tutumu 49 896 nömrə olan yeni ATS-lər istismara verilib. Hazıra bütün respublika üzrə ATS şəbəkəsinin nömrə tutumu 1717196 ədəd təşkil edir.
Nazirliyin statistikasına əsasən, hazırda hər 100 nəfərə düşən telefonların ümumi sayı bütün respublika üzrə orta hesabla 18,6 ədəd təşkil edir. Bu göstərici paytaxtda 35,7 ədəd, respublikanın digər bölgələrində 10,9 ədəd, kənd yerlərində isə 7,1 ədəd təşkil edir.
Hər 100 ailəyə 68,8 ədəd telefon düşür. Bu göstərici Bakıda 140,2 ədəd, respublikanın digər bölgələrində isə 47,6 ədəd təşkil edir.
Yanvarın 21-nə olan rəsmi məzənnə 0,7862 AZN/USD təşkil edir.
