Azərbaycan, Bakı, 13 fevral /Trend, müxbir H.Vəliyev/
"Azerfon" şəbəkəsinin abunəçiləri üçün yaxın müddətdə mobil televiziya xidmətindən istifadə mümkün olacaq. Bu barədə bazar ertəsi Trend-ə "B&BTV Communications" şirkətinin rəhbəri Səbinə Babayeva bildirib.
Babayevanın sözlərinə görə, "Azerfon" ilə bu xidmətin işə salınması üzrə müqavilənin imzalanması yaxın aylarda planlaşdırılır.
"Mobil televiziya xidmətlərini təqdim etmək üçün biz artıq mobil rabitə operatorları ilə danışıqlar aparmışıq. Layihənin texniki tərəflərinə gəlincə, biz bu xidmətləri göstərməyə tam hazırıq. Yalnız leqal kontent məsələsinin həll edilməsi qalıb ki, bu da əsas və vacib məsələdir. Bu servisi təqdim etmək üçün istifadəçilərə maraqlı olan kanalları seçmək lazımdır. Biz bu məsələni mobil operatorlarla müzakirə edirik", - Babayeva qeyd edib.
Onun sözlərinə görə, bu məsələdə əsas aspekt tariflər üzrə konsensusun əldə edilməsidir. "B&BTV Communications" şirkətinin rəhbəri kontentin çatdırılmasının ucuz başa gəlməsini vacib hesab edir. Belə ki, bu, bilavasitə tələbata təsir edəcək.
"Mobil rabitə operatorlarının olduqca böyük abunəçi bazası var və onlara bu xidmətləri təqdim etmək üçün layihənin maliyyə tərəflərini də nəzərə almaq lazımdır. Azərbaycanda ilk dəfə xidmət "BakuTel 2010" telekommunikasiya sərgisı çərçivəsində "Azerfon" ilə birgə nümayiş etdirilib", - Babayeva vurğulayıb.
"B&BTV Communications", həmçinin internet-xidmətləri işə salmaq üçün "Azertelekom" şirkəti ilə danışıqlar aparır ki, bu da kabel TV xidmətini təqdim edən şirkət üçün əlavə rəqabət üstünlüyüdür.
Kabel televiziyası ilə birgə internet-xidmətlər ayrıca internet əldə etməkdən xeyli ucuz başa gələcək.
