Azərbaycan, Bakı, 12 noyabr /Trend, müxbir H.Vəliyev/
ISOC-un (Internet Society) mərkəzi aparatı Azərbaycanda nümayəndəlik açmağı planlaşdırır. Bu barədə bazar ertəsi Trend-ə Azərbaycan İnternet Forumunun (AİF) sədri Osman Gündüz deyib.
Onun sözlərinə görə, bu təşkilatla əməkdaşlıq üzrə danışıqlar Bakıda keçirilmiş VII İnternet İdarəçilik Forumu çərçivəsində keçirilib.
ISOC-un əsas fəaliyyəti internet şəbəkəsinin inkişaf istiqamətlərinin müəyyən edilməsi və qlobal informasiya mübadiləsinə yardımdır.
ISOC-un Azərbaycan nümayəndəliyinin əsas vəzifələri internet cəmiyyətinin fəaliyyətinin nizama salınması üzrə yeni qaydaların hazırlanmasında iştirak, internet şəbəkəsinin resurslarının idarə edilməsində münaqişəli vəziyyətlərə və mübahisələrə vahid mədəni yanaşmanın formalaşması və b. ola bilər.
AİF internetin gələcəyinə müsbət təsir edəcək müstəqil orqanın yaradılacağı təqdirdə, dəstək verməyə, qlobal internet şəbəkəsinin fəaliyyəti üçün zəruri olan səmərəli idarəetmə proseslərinin inkişafına çalışmağa, həmçinin internetin reallaşdırılması və inkişafına, onun istifadəsinə və s. yardım etməyə hazır olduğunu bildirib.
