Azərbaycan, Bakı, 19 noyabr /Trend, müxbir H.Vəliyev/
"Dilmanc" proqram təminatçısı Azərbaycan dilində səs axtarışı sistemini yaradıb. Bu barədə bazar ertəsi Trend-ə "Dilmanc" layihəsinin rəhbəri Əbülfət Fətullayev bildirib.
Fətullayevin sözlərinə görə, səs axtarışı sistemi "Google" xəritələrində verilən axtarış sifarişini həyata keçirir.
"Dilmanc" tərəfindən sistemin akustik tanınması və linqvistik düzəlişləri üçün baza yaradılıb. "Dilmanc"ın yaratdığı səs axtarışı sisteminin texniki imkanları dünyadakı oxşarlarından heç nə ilə geridə qalmır.
Axtarış üzrə sifariş mikrofon vasitəsilə verilir, axtarış isə əsasən məqsədli formada aparılır. Məsələn, Bakının görməli yerlərinin (teatrlar, muzeylər, parklar və s.) konkret siyahısı əsasında. Bu, daha dəqiq axtarış aparmağa imkan verir.
"Hazırda sistem Azərbaycan dilində axtarışın nəticələrini uğurla tapır. Gələcəkdə sistemin funksiyaları Azərbaycan dilində verilən meyarlarla paralel olaraq, rus və ingilis dillərində də nəticələri göstərməyə imkan verəcək", - Fətullayev bildirib.