Azərbaycan, Bakı, 3 avqust /Trend, müxbir H.Vəliyev/
"Ookla" şirkətinin "NetIndex" reytinqinə əsasən, Azərbaycanda daxil olan internet-trafikin orta sürəti 4,19 Mbit/saniyə təşkil edir. Trend-in məlumatına görə, bu barədə şənbə günü şirkətin yaydığı məlumatda deyilir.
Bakı üzrə bu göstərici 4,65 Mbit/s, Sumqayıt üzrə isə 2,85 Mbit/s-dir.
Nəticələr şirkətin iyulun 3-dən avqustun 1-dək apardığı eksperimental araşdırmaların əsasında əldə edilib. Testlərin aparılması üçün 351 226 unikal IP ünvanı seçilib.
Azərbaycan daxil olan trafik reytinqi üzrə dünyada 122-ci yeri tutur. Reytinqdə Azərbaycanın 20 internet-servis-provayderi və rabitə operatorlarının statistik göstəricilərinin nəticələri yer alıb. Araşdırmaların aparıldığı dövrdə sadalanan rabitə qurumlarının şəbəkələrində daxil olan trafikin maksimum sürəti 10,30 Mbit/s (UNINET şəbəkəsində), minimum isə 1,89 Mbit/s ("TransEuroCom") təşkil edib.
Xaric olan trafik üzrə reytinqdə Azərbaycan 127-ci yeri tutub. Burada istifadəçilər şəbəkəyə 1,79 Mbit/s sürətlə çıxırlar. Bakı üzrə bu göstərici 2,02 Mbit/s, Sumqayıt üzrə isə 0,60 Mbit/s təşkil edir.
Xaric olan trafik üzrə reytinqdə Azərbaycanın 20 internet-servis-provayderi və rabitə operatorlarının statistik göstəricilərinin nəticələri yer alıb. Araşdırmaların aparıldığı dövrdə sadalanan rabitə qurumlarının şəbəkələrində xaric olan trafikin maksimum sürəti 8,60 Mbit/s ("Azertelecom" şəbəkəsi), minimum isə 0,41 Mbit/s ("Azerbaijan Data Network" şəbəkəsi) olub.
