Azərbaycan dilində nitqin rəqəmsal formata çevrilməsi sistemi istifadəyə hazırdır
Azərbaycan, Bakı, 28 oktyabr /Trend, müxbir H.Vəliyev/
"Dilmanc" proqram təminatçısı Azərbaycan dilində danışıq nitqinin mətn formasına çevrilməsi sistemini ümumi istifadə üçün hazır vəziyyətə gətirib. Bu barədə bazar ertəsi Trend-ə "Dilmanc" layihəsinin rəhbəri Əbülfət Fətullayev deyib.
Onun sözlərinə görə, "Dilmanc Imla" 1.1 yükləmə faylı "Dilmanc" səhifəsində yerləşdirilib.
Sistemin dil filtri tələffüzün (mikrofon vasitəsilə) özəlliyinə köklənir ki, bu da danışıq nitqini istənilən redaktədə (Word, NotePad və s.) mətn şəklinə çevirməyə imkan verir.
Sistemdə, həmçinin "Google", "Yandex" və s. axtarış sistemlərində tələffüzlə axtarış həyata keçirmək imkanı mövcuddur.
İri həcmli cümlələrin elektron formata köçürülmə sürəti isə bir neçə saniyə təşkil edir.
Sistem Azərbaycan dilində söz və söz birləşmələrini 100 faiz dəqiqliklə müəyyən etməyə imkan verir. Keyfiyyətli aparatdan (mikrofondan) istifadə və otaqda səs maneələrinin olmaması vacib məqamlardandır.
