Azərbaycan, Bakı, 19 may /Trend, müxbir H.Vəliyev/
2014-cü il mayın 19-na olan vəziyyətə görə, ölkənin ilk provayderi "Delta Telecom" şirkətinin şəbəkəsi ilə daxil olan internet-trafikin həcmi 10 faiz azalaraq 90 Gbit\saniyə təşkil edib. Trend-in məlumatına görə, bu barədə şirkətin statistik hesabatda deyilir.
Şəbəkənin yüklənmə dinamikası günün vaxtlarından asılı olaraq dəyişilir və ən böyük yüklənmə axşam saatlarına (90 Gbit\saniyə) düşür. Gündüz saatlarında bu göstərici 10 Gbit\saniyəyə qədər azalır.
Hesabata əsasən, 19 aprel-19 may tarixlərində gündüz vaxtlarında çıxan internet-trafikin maksimum həcmi 20 Gbit\saniyə təşkil edib.
"Delta Telecom" şirkətinin trafiki 29 telekommunikasiya operatoru (dövlət və özəl internet-provayderlər, mobil rabitə operatorları və digərləri) arasında bölüşdürülür.
Mayın 19-na olan vəziyyətə görə, son istifadəçiyə çatdırılan internet-trafikin daha böyük həcmi "BakinterNet" dövlət internet-provayderinin (22,05 faiz) payına düşür. İkinci yeri 13,50 faizlik pay ilə "Uninet" ("Stream" ticarət markası), üçüncü yeri isə 12,84 faizlə "Aztelekom" tutur.
Yerdə qalan 51,61 faiz "AlfaNet", "Azintex", "Eurotelecom", "Q-Telecom", "Avirtel", "Azedunet", "Caspel", "QlobalNet", "TransEuroCom", "Azerin", "AzStarNet", "Castel", "MegaTelecom", "Smart-Systems", "Azeronline", "Stellford" ("Connect" ticarət markası), "Nakhchivan", "Ultel", "Azerphone", "Azqtel", "DATAPlus", "Orbit-az", "AzEuroTel", "Bakcell", "Eurocel" və Rabitə Nazirliyinin Məlumat Hesablama Mərkəzi arasında bölüşdürülüb.
