Azərbaycan, Bakı, 26 may /Trend, müxbir H.Vəliyev/
Azərbaycanda yeni "Ipv6" internet protokoluna keçid sürətləndiriləcək. Bunu bazar ertəsi Trend-ə "Delta Telecom" şirkətinin texniki direktoru Atəş Rzayev deyib.
Onun sözlərinə görə, internet xidmətləri tədarükçülərinin "Ipv6" protokoluna keçidi məsələsi iyunda aktuallaşacaq və şirkət bununla əlaqədar internet provayderlərə hərtərəfli dəstək verməyə hazırdır.
A.Rzayev bildirib: "Əlbəttə ki, yeni protokola keçid zamanı provayderlərin istifadə etdiyi telekommunikasiya avadanlığının yenilənməsi lazımdır. Provayderlərin hazırda istifadə etdikləri avadanlıq müasir standartlara cavab verir ki, bu da köhnə Ipv4-dən yeni Ipv6 protokoluna keçid prosesini sürətləndirəcək".
Qeyd edək ki, "Delta Telecom" yeni internet protokoluna keçid məsələsi üzrə provayderlərə təkliflərini hazırlayıb və bu təkliflər yaxın ayda açıqlanacaq. Bununla əlaqədar Rabitə və Yüksək Texnologiyalar Nazirliyində internet xidmətləri tədarükçüləri və qurumun vəzifəli şəxsləri arasında görüşün keçirilməsi gözlənilir.
Hazırda Azərbaycanın təqribən 5 provayderi yeni internet protokoluna keçidə başlayıb.