Azərbaycan, Bakı, 9 sentyabr /Trend, müxbir Hüseyn Vəliyev/
İstifadəçilər üçün rəqəmli radioqəbuledicilərin qiymətinin yüksək olması Azərbaycanda rəqəmli radioyayım standartının tətbiq edilməsi prosesinə əngəl törədir. Bu barədə Trend-ə Rabitə və Yüksək Texnologiyalar Nazirliyinin "Teleradio" İstehsalat Birliyinin baş direktoru Əflatun Şərifov bildirib.
Onun sözlərinə görə, Azərbaycanda rəqəmli radio yayımı standartına keçid zamanın məsələsidir. Lakin hazırda onun tətbiqi rentabelli deyil. Çünki rəqəmli radioqəbuledicilərin qiyməti 150 manata çatır ki, bu da FM diapozonunda çalışan radioqəbuledicilərin fonunda kifayət qədər bahadır: "Azərbaycanda rəqəmli radioyayım standartına keçid məsələsi rəqəmli radioqəbuledicilərin qiymətinin əhalinin əksəriyyəti üçün əlçatan olacağı zaman aktual olacaq. Və belə vəziyyət təkcə Azərbaycan bazarı üçün səciyyəvi deyil".
Bir müddət əvvəl İB-dən Trend-ə bildirilmişdi ki, Azərbaycanda rəqəmli radio yayım Bakıda keçiriləcək 2015-ci il birinci Avropa Oyunları zamanı tətbiq edilə bilər. Paytaxtda ilk dəfə rəqəmli radioyayım beynəlxalq "Avroviziya-2012" mahnı müsabiqəsi zamanı işə salınmışdı.
Səsin yüksək keyfiyyəti, maneələrə davamlılıq, radiotezlik spektrinin daha effektiv istifadəsi və s. rəqəmli radioyayımın üstünlüyüdür.
Azərbaycanda rəqəmli radioyayımın tətbiqi üzrə işlərə rəqəmli televiziyaya tam keçiddən sonra, təxminən 2015-ci ilin əvvəlində başlanacağı planlaşdırılır.
