Azərbaycan, Bakı, 14 oktyabr /Trend, müxbir Təmkin Cəfərov/
İran televiziya və radio texnologiyaları, rəqəmsal TV və radio ötürücüləri istehsalı sahəsində Azərbaycanla əməkdaşlıq etməyə hazırdır. Bunu Azərbaycanda səfərdə olan İran Radio-Televiziya Təşkilatının sədri İzzətullah Zərqami bu gün keçirilən mətbuat konfransında deyib.
İ.Zərqami bildirib ki, İranda aşağı və yuxarı tezlikli rəqəmsal TV və radio ötürücüləri istehsalı inkişaf edib: "Yaxın zamanlarda İrandan bir qrup mütəxəssis Azərbaycana səfər edəcək və burada rəqəmsal TV ötürücüləri quraşdıracaq. Əgər İran istehsalı olan məhsulların keyfiyyəti Azərbaycan tərəfini qane edərsə, bu sahədə iki ölkə arasında əməkdaşlıq davam etdiriləcək".
O, əlavə edib ki, bu gün Azərbaycan və İran müştərək media komissiyasının yaradılmasına dair iki ölkə arasında protokol imzalanacaq: "Həmin protokola əsasən, iki ölkənin media komissiyasının yaradılması ilə bağlı ətraflı sənədin imzalanması üçün hazırlıq işləri görüləcək".