Azərbaycan, Bakı /müx. Trend S.Babayeva/ CDMA(Code Division Multiples Access) şəbəkəsi dövlət müəssisələrinin xətti ilə artıq Azərbaycanın 12 bölgəsində tətbiq olunur. Bu barədə çərşənbə axşamı Rabitə və İnformasiya Texnologiyaları Nazirliyindən məlumat veriblər.
Bu gün xidmət dövlət müəssisələri xətti ilə Abşeron, Şamaxı, Lənkəran, Quba, Xaçmaz, Zaqatala, Şəmkir, Gəncə, İmişli və digər bölgələrdə fəaliyyət göstərir. Xidmətlər nazirliyin "Aztelekom" və "Baktelekom" istehsalat birlikləri tərəfindən tətbiq olunur.
Hazırda Rabitə Nazirliyinin müəssisələri üzrə CDMA abunəçilərinin sayı 6,5 min nəfərdən çoxdur. Paytaxt daxil olmaqla CDMA şəbəkəsi ölkə əhalisinin 50 faizindən çoxunu əhatə edir. 4,5 min abunəçi "Baktelekom"un, 1,9 min abunəçi isə "Aztelekom"un payına düşür.
CDMA (Code Division Multiple Access -kod bölüşdürülməsi ilə çoxşaxəli giriş sistemi) - GSM-dən sonra yaradılan rəqəmsal simsiz texnologiyadır. CDMA danışığı rəqəmsal informasiyaya çevirir, sonra bu informasiya radiosiqnal kimi simsiz şəbəkə ilə ötürülür. 1995-ci ildə ilk dəfə kommersiya məhsulu kimi təqdim olunan CDMA dünyada ən tez yayılan simsiz texnologiyalardan biridir. 1999-ci ildə Beynəlxalq Telekommunikasiya İttifaqı (International Telecommunications Union) CDMA-nı üçüncü nəsil (3G) yeni simsiz sistemlər üçün sənaye standartı kimi seçib.
