Azərbaycan,Bakı/müxbir Trend S.Babayeva/Yanvar-aprel aylarında Azərbaycanın Rabitə və İnformasiya Texnologiyaları Nazirliyi 20 mindən çox ailəni telefonla təmin edib. Bu barədə çərşənbə axşamı nazirlikdən məlumat verilib.
Bu dövr ərzində istismara verilmiş telefon nömrələrinin ümumi sayı 20706 ədəd təşkil edib. Bunlardan 7520-si "Baktelekom" İB, qalan 13186 nömrə isə "Aztelekom"un payına düşüb.
2006-cı ildə Rabitə Nazirliyi 280594 nömrə istismara verib. Bu da 2005-ci illə müqayisədə 116409 ədəd çoxdur.
"Aztelekom" İB Naxçıvan Muxtar Respublikası istisna olmaqla respublikanın bütün ərazisini beynəlxalq və şəhərlərarası telefon rabitəsi ilə təmin edir. Onun tabeliyinə 54 Telekommunikasiya Müəssisəsi, Bakı Beynəlxalq Telefon Qovşağı, Kabel Magistral Texniki Qovşağı və Təmir-Tikinti İdarəsi daxildir.
"Baktelekom" Bakı şəhəri ərazsində dövlət müəssisələri və idarələrə, müəssisə və təşkilatlara, həmçinin xarici hüquqi şəxslərə telefon və radio rabitəsi xidmətləri göstərir. Onun tərkibində 9 Telekommunikasiya Müəssisəsi, Rabitə qurğularının tikintisi və təmiri, həmçinin "Azərrabitəlayihə" layihə-kəşfiyyat kontoru daxildir.