İranın İnsan Haqları Təşkilatı (Iran Human Rights) 2010-cu ildə bu ölkədə 546 məhbusun edam olunduğunu açıqlayıb. Bu barədə Trend İran İnsan Haqları Təşkilatının /iranhr.net/ rəsmi saytına istinadən məlumat verir.
"2010-cu ildə İranda edamlarla bağlı məruzəni yeni edam dalğalarının baş verdiyi bir zamanda hazırlayırıq. İranın rəsmi mənbələrinin açıqlamasına görə, 2010-cu ildə 346 nəfər və 2011-ci ilin yanvar ayında 85 nəfər edam olunub. Edam olunan şəxslərdən üç nəfər 2009-cu ildə keçirilən prezident seçkilərindən sonra baş vermiş qarışıqlıqda həbs olunan şəxslərdir", - məlumatda deyilir.
Məlumatda həmçinin bildirilir ki, İranda son illər edamların sayı artıb və bu, İslam Respublikasında 80-cı ilərdə baş vermiş edamlardan sonra geniş miqyaslı edamlar hesab olunur.
İran İnsan Haqları Təşkilatı beynəlxalq ictimaiyyəti ölkədə baş verən edamların tez bir zamanda dayandırılması üçün münasibət bildirməyə çağırıb.